CANGAS

 Camiños estreitos

de pedra gris perla

falan de historias,

misterios e lendas.

A memoria dun pobo,

das súas miserias,

de mulleres e homes

curtidos por elas.

Nos oídos resoan,

baixo a luz das estrelas,

segredos de amantes,

bicos e promesas.

Guerras finxidas

de paus e carreiras,

rememoran os tempos

de piratas e meigas.

As xentes humildes,

de portas abertas,

veciños de todos,

familias enteiras.

Salgados aromas

de mar, de ribeira,

nas rúas, nas roupas,

nos cantos de taberna.