LATEXOS

 

Síntense en aumento  

os latexos do océano 

sobre as ondas asimétricas

que remexen no interior

e ocultan o chan firme;

a seguridade de facer pé

e non afogar no descoñecido

xa non está.

A desconfianza.

Treme o trono

que cría ben asentado.

Os pensamentos

veñen, van, traendo

un desequilibrio tirano.

A indecisión covarde

aniquila 

calquera oportunidade

de revivir

a experiencia do amor.

Seguín sempre falsos camiños

na miña vida,

perdín o xogo cada vez,

cada partida.

Finalmente terei que morrer

para vivir nos teus ollos;

acostumarme ao presente

da túa presenza

ausente.